Fueu amigu

La competición p'algamar el títulu de llambiculos mayor del reinu hasta va poco taba bastante disputada: nun mos faltaben periodistas pa celebrar esi rei tan campechanu que tenemos, confiteros que -y llamaben « letizias » a nun sé qué pastelucu, alcaldes y conseyeros tascándose a los príncipes nel Campoamor. Pero a partir d'agora toles discusiones sobre'l tema son ocioses. Ta claro que'l títulu ha de llevalu con tol merecimientu el fulanu qu'acaba de demostrar, supongo que tres de varios meses de trabayu, que la nuestra princesina tien sangre real.

De la que se creó la RTPA yá pudimos ver que la televisión pública asturiana taba inspirada directamente na BBC. Igual que nel so modelu británicu, la programación, ambiciosa y exixente, nun fai nenguna concesión a la demagoxa nin al populismu. Nun hai más que ver el tratamientu que se -y dio al tema llingüísticu: como los asturianos yá disponíen de dos o tres docenes de cadenes qu'emitíen les 24 hores del día n'español, lo fácil yera crear una canal n'asturiano dafechu. Pero los dirixentes del ente públicu nun se dexaron llevar por esa facilidá y la presencia de la llingua na programación acabó siendo de media hora diaria. Lo que vien a representar trenta minutos más que na BBC.

Sicasí na puesta en marcha de la TPA nun fue too aciertos. Ye menester reconocer que si dende'l principiu cumpliéronse con creces les misiones d'informar y divertir, la dimensión educativa quedó un pocu escaecida. Seguramente pa reparar esti olvidu creóse un programín que se titula Asturias en movimiento, y que se pue ver equí, na páxina internet de la cadena.

Ye una producción audiovisual de malapenes dos minutos que retoma les principales característiques del NO-DO, de les películes de Leni Riefenstahl y de los noticiarios soviéticos. Por exemplu, nel séptimu capítulu dedicáu a un pueblín de Nava, descríbese cómo la vida de los vecinos dio un xiru de 180 graos gracies al llabor del Réxime que -yos arregló los caminos. El pueblu ye agora la imaxe mesma del paraísu : caleyes amplies y llimpies, cases típiques con corredores floríos, xente sano y noble que pasa'l tiempu sallando pataques o lleendo a la sombra d'un carbayu... ¿Qué meyor símbolu pa acabar el programa qu'esi nenín circulando en patinete pelos caminos recien arreglaos? Sí, definitivamente n'Asturies va too sobre ruedes, nun puede menos que pensar l'espectador.

L'oxetivu d'Asturias en movimiento paezme que ta bastante claru : trátase de fomentar l'espíritu críticu de los ciudadanos faciéndo-yos ver les principales técniques usaes nes películes de propaganda. Pedagoxía pura.

Un de los principales encantos de Libération ye la bayura de xuegos de palabres qu'asalten al llector dende los titulares. Por una vez que se puede traducir, nun resisto a la tentación de copiar ún que se puede lleer na edición de güei : L'himen y l'amén de los xueces.
Refierse l'artículu a la última polémica en Francia a propósito de la decisión d'un xuez d'anular el matrimoniu d'una pareya de confesión musulmana porque la novia nun yera virxe. Tamos nel país de Feydeau y de Pierre Loüys, pero vese qu'en materia d'amores hailos que tomaron otru modelu. Diben afayase bien n'un d'esos pueblos d'Asturies que conocí de mozu y de los que falaba va poco. Esos pueblinos tan prestosos onde tener relaciones sexuales, más qu'un pecáu, yera un milagru.

Lleíamos va poco, aterraos, la noticia del austriacu que tuvo tuvo secuestrada venticuatro años a la fía. ¿Quién nun s'estremeció pensando no que que vivió esa mocina? ¿Cómo nun sentir compasión por ella, sabiendo que va tener que pasar el restu de la vida tratando de sobrellevar esi pasáu?

Comentaba la noticia estos díes ún que -y gusta como a min echar la llingua a pacer y venía a dicir qu'esti casu yera revelador de la deriva de les sociedaes post-modernes: la xente, sobremanera nes ciudaes, ye cada vez más individualista y vivimos aisllaos unos d'otros. Nos llugares onde onde tol mundu se conoz un sucesu asina ye impensable y ta claro que nun pasaría enxamás nun pueblu d'Asturies. En Xixón o n'Uviéu igual sí, conclúi un pocu arrespigáu.

Nun sé si pal autor del blog la sociabilidá ye privativa de los pueblos d'Asturies o si tamién se da pelos de Castiella, en Gascuña o nel Alentejo, pongo por casu. Lo que si me paez ye que cai nuna tentación bastante frecuente ente los asturianistes : la idealización del mundu rural, vistu como un llugar pobláu d'homes y muyeres nobles, llibres de la corrupción y del viciu que se tien apoderao de les ciudaes. A la pureza del alma de la xente de los pueblos correspuende la del asturiano que falen, llimpiu de castellanismos y de toa mancha. N'últimu términu, recuperar la llingua de los nuestros güelos, les sos tradiciones campesines y hasta la so manera de vistise vien a ser lo mesmo, una manera de volver a esi paraísu del que cuantayá que mos echaron.

El que tenga lleío Dies de muncho d'Antón García podrá facese una idea sobre esi paraísu. No que a mí me respecta, yo que me crié nun pueblín del centru d'Asturies, doi gracies al cielu tolos dís de vivir a mil quilómetros de la mirada de los mios vecinos. Y eso que nun soi homosexual, xitanu, llector de poesía o muyer adúltera.

Nun soi de los vuestros. Tócame vivir cola llaga abierta de saber que la llingua que me val pa tratar d’entender el mundu nun será seguramente la de los mios fíos.
Llucho como puedo pa que nun seya asina. Vosotros tamién, sí, nun pongo en dulda la vuestra sinceridá. Pero nesti combate, l’Enemigu tenémoslu en casa. Vive ente nosotros y tien varios nomes: llámase sectarismu; llámase tamién inorancia, galbana y victimismu.
Nun contar conmigo pa lloramiquiar, pa esparder la xirigoncia nin p’adormecer a los nenos con histories de pueblos oprimíos, de represores y de lluchadores pola llibertá.
La única arma na llucha pola supervivencia del asturiano ye la palabra . La palabra bien dicha, bien cantada y bien escrita. Nun hai otro.